Капсулу міру перадалі на захоўванне ў музей «Замкавы комплекс «Мір»
2023-02-02
Удзел ва ўрачыстай цырымоніі прыняў старшыня Гродзенскага аблвыканкама Уладзімір Каранік. «Мірскі замак нібы пацвярджае вечную ісціну, што мір - дабрадзейнасць цывілізацыі. Таму не выпадкова ў нас узнікла прапанова ў Год міру і стварэння менавіта ў гэты ўнікальны комплекс перадаць на захоўванне капсулу міру з нашым пасланнем нашчадкам. У яго радках мы адлюстравалі рэаліі сучаснай рэчаіснасці, нашы каштоўнасці і ідэалы, упэўненасць у заўтрашнім дні і надзею на шчаслівую будучыню наступных пакаленняў у роднай і любімай Беларусі», - сказаў Уладзімір Каранік.
Капсулу міру на захоўванне тэрмінам 25 гадоў прыняў дырэктар замкавага комплексу Аляксандр Лойка. Як адзначылі ўдзельнікі цырымоніі, праводзячы акцыю 2 лютага, успамінаюцца падзеі 80-гадовай даўніны - дзень заканчэння Сталінградскай бітвы. Гэта генеральная бітва Вялікай Айчыннай вайны паклала пачатак разгрому нямецка-фашысцкай Германіі і надыходу міру на зямлі.
па матэрыялах БелТА