Зварот дырэктара
Шаноўныя сябры!
Мы рады, што Вы наведалі наш сайт. Застаецца спадзявацца на хуткую сустрэчу не толькі ў віртуальнай рэальнасці.
Сардэчна запрашаем у наш утульны куток даўніны - у велічны і ўнікальны Мірскі замак, дзе мінулае сустракаецца з сучаснасцю, а шпілі старадаўніх вежаў скіраваны ў будучыню.
За плячыма дарога даўжынёю ў пяць стагоддзяў: войны, разбурэнні і, нарэшце, - адраджэнне архітэктурнага шэдэўра Беларусі, яго ўключэнне ў Спіс Сусветнай спадчыны ЮНЕСКА!
Нашы супрацоўнікі з вялікім задавальненнем раскажуць Вам пра гісторыю комплексу і яго ўладальнікаў, дапамогуць акунуцца ў атмасферу магнацкага жыцця і дакрануцца да жывога подыху стагоддзяў. У залях і фондах Мірскага замка беражліва захоўваюцца ўнікальныя экспанаты для будучых пакаленняў.
Сёння наш музей з'яўляецца адным з самых шматпрофільных культурных устаноў краіны: да паслуг наведвальнікаў камфартабельны гатэль, рэстаран з арыгінальнымі рэцэптамі старабеларускай кухні, дзве канферэнц-залі для правядзення мерапрыемстваў на высокім узроўні, сувенірная крама з вырабамі беларускіх майстроў.
Мірскі замак – не проста нацыянальнае багацце Беларусі, ён турыстычны брэнд, цэнтр прыцягнення сотняў тысяч турыстаў з усяго зямнога шара.
Мы хочам, каб аднойчы наведаўшы наш музей, Вы захацелі вяртацца сюды зноў і зноў.
У Мірскім замку Вас заўсёды чакаюць, тут Вам заўсёды рады!
Сардэчна запрашаем!
Да хуткай сустрэчы!
Дырэктар музея «Замкавы комплекс «Мір» Аляксандр Часлававіч Лойка.