У Полацку адкрылася часовая экспазіцыя з фондаў музея «Замкавы комплекс «Мір»

2025-01-17

З 15 студзеня 2025 г. у самай старой грамадзянскай пабудове канца XVII ст. г. Полацка па вуліцы Ніжне-Пакроўскай пачала працу часовая экспазіцыя з фондаў музея «Замкавы комплекс «Мір» – «Погляд у мінулае: мода, стыль і прыгажосць». Гэтая модульная перасоўная выстава была створана ў канцы 2023 г., і за год з ёй пазнаёміліся наведвальнікі не толькі Мірскага замка, але і жыхары Мінска, Ліды і іншых гарадоў. Сёння часовую экспазіцыю можна ўбачыць у старажытным горадзе Беларусі.

На выстаўцы прадстаўлены ў асноўным мужчынскія і жаночыя аксэсуары прадстаўнікоў вышэйшага грамадства ХІХ – пачатку ХХ стст. Гэта больш за 50 экспанатаў, якія збіралі супрацоўнікі музея не адзін год. Багацце калекцый прадстаўлена бісернымі і карункавымі вырабамі, швейнымі прыладамі, аксэсуарамі для курэння, прадметамі, якімі дамы і кавалеры карысталіся ў тэатры, на балях, падчас чаявання, а таксама бралі з сабой, выходзячы з дому на шпацыр або наносячы візіты суседзям. Дапаўняюць часовую экспазіцыю анатацыі. Тэкст з выявамі аксесуараў, гравюр і іншых рэдкіх прадметаў са збору музея «Замкавы комплекс «Мір» размешчаны на спецыяльных стэндах.

Падчас адкрыцця выставы Вольга Навіцкая, намеснік дырэктара музея «Замкавы комплекс «Мір», сказала аб унікальнасці і значнасці праекта, які працягне падарожнічаць па іншых музеях рэспублікі. Для першых наведвальнікаў выставы і супрацоўнікаў Нацыянальнага Полацкага гісторыка-культурнага музея-запаведніка экскурсію правялі самі куратары праекту Вераніка Красоўская і Наталля Кавалевіч.

Выстаўка будзе працаваць да сярэдзіны красавіка 2025 г.