Удзел ва Усерасійскай навукова-практычнай канферэнцыі «Дванаццатыя крамлёўскія чытанні»

2024-11-13

Супрацоўнікі музея «Замкавы комплекс «Мір»: намеснік дырэктара па навуковай і асветніцкай працы Вольга Навіцкая, галоўны захавальнік музея Сафія Буцько, навуковы супрацоўнік Наталля Кавалевіч і старшы навуковы супрацоўнік Наталля Марэцкая, прынялі ўдзел ва Усерасійскай навукова-практычнай канферэнцыі «Дванаццатыя Крамлёўскія чытанні» на тэму «Культурныя Масты: формы музейнага партнёрства і супрацоўніцтва», якая праходзіла 7–9 лістапада 2024 г.

Канферэнцыя была прысвечана партнёрству ў працы музеяў, а таксама ўзаемадзеянню музеяў з культурнымі інстытуцыямі, бізнесам, некамерцыйным сектарам, адукацыйнымі ўстановамі і навуковымі цэнтрамі. Музейныя спецыялісты, супрацоўнікі выставачных залаў і культурных цэнтраў, куратары выставачных і партнёрскіх праектаў з Расіі і Беларусі ў сваіх дакладах дзяліліся дасягнутымі вынікамі.

Першыя два дні канферэнцыі былі праведзены ў музеі-запаведніку «Казанскі Крэмль», дзе адбыліся панэльная дыскусія «Культурныя масты: формы музейнага партнёрства і супрацоўніцтва», а таксама секцыі «Як музеям супрацоўнічаць з іншымі ўстановамі культуры», «Вопыт прыцягнення іншых рэсурсаў для рэалізацыі музейных праектаў», «Формы ўзаемадзеяння паміж бізнесам і культурай», «Праца са школамі і ВНУ».

Выязная сесія «Узаемадзеянне музея і навуковых цэнтраў. Рэстаўрацыя. Кансервацыя. Музеефікацыя» праходзіла ў трэці дзень канферэнцыі на базе Балгарскага гісторыка-архітэктурнага музея-запаведніка.

Абодва аб’екты, Казанскі Крэмль і Балгарскі гісторыка-археалагічны комплекс, як і Замкавы комплекс «Мір» з’яўляюцца аб’ектамі, уключанымі ў спіс Сусветнай спадчыны ЮНЕСКА.