Прэзентацыя факсімільнага выдання Жухавіцкага Евангелля

2023-11-11

11 лістапада 2023 г. у Партрэтнай зале Мірскага замка адбылася прэзентацыя факсімільнага выдання Жухавіцкага Евангелля XVI ст. З прывітальным словам выступілі дырэктар музея «Замкавы комплекс «Мір» Аляксандр Лойка, сакратар Навагрудскага епархіяльнага ўпраўлення, протаіерэй Дзімітрый Сёмуха, беларускія спецыялісты ў галіне вывучэння рукапісных помнікаў кандыдат філалагічных навук, дацэнт Ірына Будзько і кандыдат мастацтвазнаўства Алена Пікулік, дырэктар Карэліцкага раённага краязнаўчага музея Ларыса Кузьміч.

Вакальны гурт «Сузор’е» і ўзорны хор «Званочак» (кіраўнік – Людміла Юрчык) усім прысутным у Партрэтнай зале падарылі святочны настрой.

Факсімільнае выданне Жухавіцкага Евангелля падрыхтавана тыражом 99 экзэмпляраў з захаваннем усіх асаблівасцей арыгінала. Першы экзэмпляр быў перададзены ў царкву Раства Іаана Прадцечы ў Малыя Жухавічы ў верасні гэтага года.

Першыя пісьмовыя згадкі пра Жухавічы датуюцца сярэдзінай XV ст. У 1512 г. яны былі набыты Юрыем Іванавічам Іллінічам, заснавальнікам Мірскага замка, і ў 1569 г. увайшлі ва ўладанні Радзівілаў.

Згодна з запісам, які захаваўся на адным з аркушаў рукапісу, Евангелле ў кастрычніку 1733 г. знаходзілася ў царкве с. Малыя Жухавічы. Гэта значыць, што рукапіс мае беларускае паходжанне. Невядомы час перамяшчэння рукапісу ў Віленскі беларускі музей імя Івана Луцкевіча (дзейнічаў у 1921–1945). У Бібліятэцы імя Урублеўскіх Літоўскай акадэміі навук Жухавіцкае Евангелле апынулася не пазней за 1947 г.

Культурны праект «Даследаванне і факсімільнае выданне помніка беларускага пісьменства Жухавіцкага Евангелля XVI ст.» з фондаў Бібліятэкі імя Урублеўскіх Літоўскай акадэміі навук быў ініцыіраваны музеем «Замкавы комплекс «Мір» у рамках работы Камісіі па выяўленні, вяртанні, сумесным выкарыстанні і ўвядзенні ў навуковы і культурны ўжытак культурных каштоўнасцей.

Вынікі праекта дазволяць не толькі працягнуць плённае навуковае вывучэнне Жухавіцкага Евангелля, але і шырока рэпрэзентаваць яго як выдатны узор кніжнай культуры і кніжнага мастацтва Беларусі.